नवलपरासी पश्चिम जेठ १९ गते । जिल्ला विपद् व्यवस्थापन समितिको आइतबार सम्पन्न बैठकले नवलपरासी पश्चिममा मनसुन पूर्वतयारी तथा प्रतिकार्य योजना २०८२ स्वीकृत गरेको छ । जिल्लाका सरोकारवालाहरु सम्मिलित बैठकले मनसुन पूर्वतयारी तथा प्रतिकार्य योजना २०८१ लाई अद्यावधिक गरी अनुमोदन गरेको हो ।
यस वर्षको मनसुनमा अत्याधिक वर्षा हुने प्रक्षेपण गरिएकोले सबै स्थानीय तह, सुरक्षा निकाय, रेडक्रस, विषयगत सरकारी कार्यालय,गैरसरकारी संघसंस्थासगँ समन्वय गरी विपदको पूर्वतयारीलाई चुस्त बनाइ धनजनको क्षति हुन नदिने निर्णय गरिएको सहायक प्रमुख जिल्ला अधिकारी पोषणराज भण्डारीले जानकारी दिनुभयो ।
प्रमुख जिल्ला अधिकारी हिरालाल रेग्मीको अध्यक्षता तथा जिल्ला समन्वय समितिका प्रमुख भगौती यादवको प्रमुख आतित्थ्यतामा भएको बैठकमा सहभागितहरुले यस जिल्ला बाढीबाट प्रभावित हुँदै आएकोले पूर्वतयारी र विपद् व्यवस्थापनलाई प्रभावकारी बनाउन जोड दिएका थिए । उनीहरुले जसकालागि जिल्लामा बग्ने खोला तथा नाला सफाई एवं निकासको व्यवस्थापन गर्न जरुरी रहेको बताएका छन् ।
जल तथा मौसम विज्ञान विभागका अनुसार यस वर्ष जेठ १८ गतेदेखि असोज १४ गतेसम्मको चार महिनाको मनसुन ऋतुमा देशमा अधिकांश स्थानमा सरदरभन्दा बढी वर्षा हुने सम्भावना रहेको साथै अधिकतम तापक्रम र न्यूनतम तापक्रम समेत देशभर सरदर भन्दा बढी रहने सम्भावना रहेको भन्दै बैठकले सबै स्थानीय तहहरुलाई मनसुनजन्य विपदबाट प्रभावित र विस्थापित हुन सक्ने नागरिकलाई सुरक्षित साथ राख्न सक्ने स्थानहरुको अबिलम्ब पहिचान गरी राख्न आग्रह गरेको छ ।
जिल्लास्थित सबै स्थानीय तहहरुले स्थानीय विपद् आपतकालिन कार्य संचालन केन्द्रलाई सुदृढ बनाई विपदको समयमा सक्रिय रुपमा परिचालित गरी विपदको घटनाहरुको सूचना संकलन, आदानप्रदान तथा उद्धारको कार्यमा समन्वय एवं सहकार्य गर्ने निर्णय गरेको छ ।
मनसूनको अवधिमा बाढी तथा डुबानका कारण ठूलो जनधनको क्षतिहुने सम्भावनालाई मध्यनजर गर्दै सबै स्थानीय तहबाट स्थानीय विपद् व्यवस्थापन कोषमा यथेष्ठ मौज्दात रकमको व्यवस्था गर्न जिल्लास्थित सबै स्थानीय तहलाई बैठकले अनुरोध गरेको छ ।
यस्तै बैठकले बाढी, पहिरो, चट्याङ ,डुवान जस्ता विपद्का घटना र सोबाट हुन सक्ने सम्भावित जाखिमबाट बच्न र क्षति न्यूनिकरणका लागि स्थानीय तह र सरोकारवाला निकायहरुबाट विद्यालय तथा समुदायस्तरमा जनचेतना अभिवृद्धि गर्ने निर्णय गरेको छ ।

विपदका समयमा पीडित र प्रभावितका लागि आवश्यक पर्ने खाद्यान्न, औषधी सुरक्षित आश्रयस्थल, खानेपानी तथा सरसफाईको आवश्यक व्यवस्था तथा राहत वितरणमा एकद्धार प्रणालीको अवलम्बन गर्ने र विपद्का समयमा पानीजन्य रोग संक्रमण फैलिन सक्ने संभावना रहेकाले स्वास्थ्य कार्यालयबाट आवश्यक औषधि लगायतका स्वास्थ्य सामाग्रीको प्रवन्ध गर्ने निर्णय गरेको छ ।
मनसुनको समयमा राष्ट्रिय राजमार्ग अवरुद्ध हुन सक्ने भएकाले एकघण्टा भित्र राजमार्ग सुचारु र्ग्न डिभिजन सडक कार्यालय, बुटव नारायणगढ सडक स्तरोन्नती आयोजना र हुलाकी रामार्ग आयोजना लगायतका सम्बन्धित निकायहरुलाई तयारी अवस्थामा रहन निर्देशन गरिएका छ । जिल्लास्थित गण्डक नहरमा समेत अत्याधिक बाढी आउने र नहर तथा बाँधहरु भत्कन सक्ने जोखिमलाई मध्यनजर गरी नेपाल गण्डक पश्चिम नहर सिंचाई व्यवस्थपन डिभिजन कार्यालयलाई विशेष सतर्कता अपनाउन निर्दैशन गरिएको छ ।
गतबर्ष नवलपरासी पश्चिममा चट्याङ्गबाट एक पुरुषको मृत्यु तथा एक महिला घाइते , अविरल वर्षाबाट १० घर पूर्णक्षती र ४८ घरमा आशिंक क्षति भएको जिल्ला प्रशासन कार्यालयको तथ्यांकमा उल्लेख छ । बाढीका कारण सरावल गाउँपालिकामा झरही, धनेवा, हुलासी खोला र गण्डक नहरका कारण एक हजार १०० विघा, पाल्हीनन्दन गाउँपालिकामा झरही,धनेवा, तुरिया,पुसाहा र रामखण्डा खोलाका कारण ९३३ विघा, बर्दघाट नगरपालिकामा खजुरा, बगटीया र आम्बास खोलाको कारणले ५०० विघा जमिन डुबान हुने गरेको छ ।
रामग्राम नगरपालिकामा तुरिया खोलाको कारण २०० विघा, सुस्ता गाउँपालिकामा श्रीखोला,अम्चुर, पोटाहा र रायपुर खोला तथा गण्डक नहरका कारण ३०० विघा जमिन डुबानमा पर्ने गरेको छ । भने सुनवल नगरपालिकामा तुरिया, पानभार तथा जर्गाहा खोलाका कारण कटानको समस्या हुने गरेको जिल्ला प्रशासन कार्यालयले जनाएको छ ।
बैठकमा सुनवल नगरपालिकाको नगरप्रमुख विमला अर्याल, सरावल गाउँपालिका अध्यक्ष सुखाडीप्रसाद चौधरी, बर्दघाट नगरपालिकाको उपप्रमुख रुद्रप्रकाश उपाध्याय र रामग्राम नगरपालिकाको विपद् व्यवस्थापन फोकल पर्सन सुमित्रा चौधरीले सम्भावित विपदको जोखिम न्यूनीकरणका लागि आवश्यक पूर्वतयारीलाई चुस्त बनाइएको जानकारी दिनुभएको थियो ।