नवलपरासी पश्चिम , मङ्सिर ९ गते । नेपाल उखु उत्पादक कृषक महासंघले यहीँ मङ्सिर १३ गतेसम्म उखु किसानले पाउनुपर्ने गत आर्थिक वर्षको बक्यौता रकम निकासा गर्न माग गरेकाे छ । आज मंगलबार कृषि तथा पशुपन्छी विकास मन्त्री डाक्टर मदन प्रसाद परियारलाई भेटेर महासंघले यस्ताे माग गरेकाे हाे । सरकारले उखु किसानलाई यस अघि दिएकाे ३५ रुपैयाँका दरले बाकि अनुदान रकम तत्काल निकासा गर्नुुपर्ने र यस वर्षको क्रसिङ्ग सिजनमा उखुको न्यूनतम समर्थन मूल्य त्रिपक्षीय सहमति अनुसार रु. ७५० प्रति क्विन्टल कायम गर्नुपर्ने माग गरिएकाे महासंघका प्रवक्ता उमेशचन्द्र यादवले जानकारी दिनुभयो ।
उहाँले किसानलाई अनुदान रकम पुरा भुक्तानीको विषयमा यसअघि सरकारकाु पटक-पटक ध्यानाकर्षण गराउदा समेत सुनुवाइ नभएकाे भन्दै आन्दोलनकाे विकल्प नभएकाे बताउनुभयाे ।
चालु सिजनमा उखु बिक्री गर्ने समय भइसक्दा समेत गत वर्षकै अनुदान भुक्तानी नहुँदा यतिबेला उखु किसानहरू मर्कामा परेका छन् ।
यसअघि भएकाे आन्दोलनमा चालु आर्थिक वर्ष २०८२/ ०८३ काे क्रसिङ सिजनमा उखुको न्यूनतम सर्मथन मूल्य ७ सय ५० रुपैयाँ रहने किसान, उद्योगी र सरकारबीच त्रिपक्षीय सहमति भएकाे थियाे ।
माग पुरा नभए मङ्सिर १४ गते बाट आन्दोलनका कार्यक्रम सुरु गर्ने महासंघले घोषणा गरेको छ ।