परासी, १४ भदौ । नेपाल रेडक्रस सोसाइटी बर्दघाट उपशाखाले आधारभूत प्राथमिक उपचार तालिम दिएको छ । बर्दघाटस्थित न्यू लाइफ माविमा सञ्चालन गरिएको घरेलु प्राथमिक उपचार सीप तालिममा उपशाखा अन्र्तगतका विद्यालयको सहभागिता थियो ।
११ विद्यालयका विद्यार्थी तथा शिक्षक नायक गरी ६० जनाको सहभागिता रहेको उक्त तालिममा प्राथमिक उपचार सीप,घाइते जाँचका चरणहरु,बेहोसी, रक्तश्राव,पट्टीहरुको प्रयोग,घाइतेहरुको ओसारपसार लगायतका महत्वपूर्ण सीपहरुको विषयमा प्रशिक्षण गरिएको नेपाल रेडक्रस सोसाइटी बर्दघाट उपशाखाका सभापति नारायण अधिकारीले जानकारी दिनुभयो ।
दुई दिनसम्म सञ्चालित तलिममा नेपाल रेडक्रस सोसाइटी जिल्ला शाखाका सदस्य घनश्याम प्रसाद यादव र बसन्त रेग्मीले प्रशिक्षण दिनुभएको थियो । तालिमको शनिबार एक कार्यक्रम गरी समापन गरिएको छ ।
उपशाखा सदस्य एवं जुरेस÷युरेस संयोजक डिबी अधिकारीको अध्यक्षतामा भएको उक्त कार्यक्रमलाई प्रमुख अतिथिको रुपमा सम्बोधन गर्दै नेपाल रेडक्रस सोसाइटी जिल्ला शाखा नवलपरासीका सभापति राजेन्द्रप्रसाद अग्रहरीले प्राथमिक उपचार सम्बन्धी तालिम प्रत्येक व्यक्तिका लागि आवश्यक रहेको बताउँदै सिकेका कुरालाई व्यवहारमा प्रयोग गर्न आग्रह गर्नुभयो ।
रेडक्रसको महत्वपूर्ण सीप मध्ये प्राथमिक उपचार सीप महत्वपूर्ण रहेकोले रेडक्रसले यस किसिमका तालिमहरु नियमित रुपमा सञ्चालन गर्दै आएको सभापति अग्रहरीले बताउनुभयो । रेडक्रसले सात सिद्धान्तलाई पालना गर्दै सँधै निष्पक्ष र तटस्थ रुपले मानवीय सेवा गर्दै आएको भन्दै जिल्ला सभापति अग्रहरीले रेडक्रस अभियानमा समाहित हुन जोड दिनुभयो । बर्दघाट उपशाखाले विभिन्न गतिविधिसहित आफूलाई जिल्लामै उत्कृष्ट शाखाको रुपमा स्थापित गर्न सफल भएको भन्दै उहाँले प्रशंसा पनि गर्नुभयो ।
रेडक्रस बर्दघाट उपशाखाका सभापति अधिकारीले प्राथमिक उपचार दिवसको पूर्व सन्ध्यामा यो तालिम आयोजना गरिएको बताउँदै उपशाखाले यसअघि पनि विभिन्न रचनात्मक कार्यक्रमहरु गरी मानवीय सेवासहित रेडक्रस अभियानलाई अघि बढाइरहेको बताउनुभयो । आगामी भदौ २० गते उपशाखाकै आयोजनामा बर्दघाटस्थित शिवालय मन्दिरमा उपशाखा अन्र्तगतका १८ विद्यालयका जुरेसमा आवद्ध विद्यार्थी र शिक्षक नायकलाई लक्षित गरी प्रशिक्षणसहित स्वास्थ्य परीक्षण शिविर सञ्चालन गर्न लागेको सबैलाई सहभागि हुन समेत आग्रह गर्नुभयो ।
उक्त अवसरमा नेपाल रेडक्रस सोसाइटी जिल्ला शाखा सkalpदस्य एवं प्राथमिक उपचार संयोजक रुद्रकुमारी कँडेल, नेपाल स्वयमसेवी रक्तदाता समाज जिल्ला शाखाका अध्यक्ष एवं पत्रकार मोहन पौडेल, शिक्षक दीपक बराल लगायतले पनि शुभकामना व्यक्त गर्नुभएको बर्दघाट उपशाखाका सचिव धनञ्जय पौडेलले जानकारी दिनुभयो ।